Tanush Çaushi: Banesat Historike të Konispolit po shemben dhe historia para syve tanë!

Konispoli, qyteti më jugor i Shqipërisë, mban mbi shpinë një trashëgimi të rrallë historike dhe kulturore që po rrezikon të zhduket përpara syve tanë. Banesat karakteristike që kanë rezistuar mbi 200 vjet, që janë shpallur monumente kulture dhe që përfaqësojnë identitetin tonë arkitektonik e historik, sot po rrënohen njëra pas tjetrës, në heshtje.

Tanush Çaushi, inxhinier ndërtimi, aktivist dhe kandidat për deputet në qarkun e Vlorës me koalicionin "Nisma Shqipëria Bëhet", ka ngritur zërin për këtë problem, duke kërkuar ndërhyrje të menjëhershme.

“Këto banesa nuk janë thjesht mure të vjetër, janë histori, janë kujtesë, janë pasuri kombëtare. Dhe sot po lihen në mëshirë të kohës. Nuk kemi më kohë për të pritur. Po nuk vepruam tani, do t’i humbasim përgjithmonë,” – u shpreh Çaushi.

Një shembull i qartë është shtëpia e Alush Takës në lagjen "Shehat", një ndër banesat më emblematike të Konispolit, që sot është në gjendje dramatike, me çatinë të shembur dhe muret në prag rrënimi. E njëjta histori përsëritet në shumë lagje të qytetit.

“Ne nuk mund të flasim për zhvillim, nëse rrënojmë historinë. Banesat historike nuk janë barrë, janë aset. Janë një mundësi për të krijuar vende pune, për të rritur turizmin dhe për ta vendosur Konispolin aty ku e meriton – në hartën e vendeve me vlerë,” – tha më tej Çaushi.

Ai kërkon që trashëgimia të mos mbetet vetëm në fjalime, por të jetë pjesë e politikave konkrete. Nëse do të përfaqësojë qytetarët në Kuvend, do të nxisë një paketë ligjore për mbrojtjen dhe restaurimin e banesave historike në qytetet e vogla si Konispoli, ku mbështetja shtetërore ka munguar për vite.

Mos ta lejojmë historinë të shembet. Jo përballë syve tanë. Jo në heshtje.

Me 11 Maj, mbështet një zë që nuk le historinë në harresë. Voto për Tanush Çaushin dhe "Shqipëria Bëhet". Sepse e shkuara e ruajtur me dinjitet është pjesë e të ardhmes që duam të ndërtojmë.