Tanush Çaushi: "Shqiptarëve nuk u duhen paga minimale fiktive, por minimum jetese me ligj"
- Anxhela Qyshka
- 6 days ago
- 2 min read
Pas deklaratës së Kryeministrit Rama se paga minimale në vitin 2026 do të shkojë në 500 euro, kandidati për deputet i Koalicionit “Nisma Shqipëria Bëhet” në qarkun e Vlorës, Tanush Çaushi, ka reaguar me një mesazh të qartë: shqiptarëve nuk u duhen shifra që nuk preken në jetën reale, por zgjidhje të prekshme për mbijetesë.
“Të flasësh për 500 euro pagë minimale, ndërkohë që një pjesë e madhe e popullsisë nuk i kap as 200 euro në muaj, është tallje. Shqiptarët nuk kanë nevojë për deklarata me zero ndikim, por për vendosjen e një minimumi jetese me bazë ligjore. Kjo do të përfshinte jo vetëm ata që janë në punë, por edhe shtresat në nevojë, personat me aftësi të kufizuar, pensionistët me të ardhura të ulëta e çdo familje që sot jeton në kufijtë e mbijetesës,” – u shpreh Çaushi.
Ai shtoi se sot në Shqipëri nuk ekziston asnjë ligj që garanton një minimum jetese për qytetarët. Paga minimale vendoset nga qeveria në mënyrë të njëanshme, ndërkohë që mijëra qytetarë jetojnë nën nivelin e varfërisë dhe nuk përfitojnë as nga kjo pagë minimale, sepse thjesht nuk kanë një vend pune të regjistruar.
“Flasim për paga minimale, por harrojmë se ka qindra mijëra njerëz që nuk kanë asnjë të ardhur fikse. Ka pensionistë me më pak se 100 euro në muaj, njerëz me aftësi të kufizuara që marrin ndihmë qesharake, familje të tëra që mbahen me ndihma sociale që nuk mbulojnë as bukën dhe qiranë. Minimumi jetik duhet të jetë i garantuar me ligj – dhe jo të varet nga vullneti politik apo propaganda elektorale,” – tha Çaushi.
Ai theksoi se nëse do të zgjidhet deputet, një nga nismat e tij të para në Parlament do të jetë hartimi dhe miratimi i ligjit për minimumin jetik, si një mekanizëm për të mbrojtur dinjitetin dhe sigurinë e çdo qytetari, pavarësisht nëse është në punë apo jo.
“Shqiptarët nuk jetojnë me propagandë. Jetojnë me lekët që marrin në dorë, që shpesh nuk mjaftojnë as për ushqimet bazë. Ne nuk mund të pretendojmë zhvillim, kur nuk garantojmë as jetesën minimale për njerëzit tanë.”
Tanush Çaushi është një prej kandidatëve që ka ngritur vazhdimisht zërin për mbrojtjen e shtresave të pafavorizuara dhe për një politikë sociale që respekton dinjitetin e njeriut, jo shifrat në fletë.
Me 11 Maj, ai i kërkon qytetarëve të votojnë për një zë që nuk hesht përballë padrejtësive sociale dhe që nuk ka frikë të përballet me realitetin.
Comments